Jozua 10
16 Dij vief Amorietische keunenks wazzen der oetnaaid en beziedkropen in n grot bie Makkeda.
17 Jozua kreeg tieden: "Ze hebben heur vonden, dij vief keunenks! Haren zok beziedstopt in n grot bie Makkeda."
18 Hai zee: "Ie mouten dikke stainen veur ingang van grot schoeven en der n poar wachtslu bie zetten.
19 Mor zulm doar nait blieven. Blief achter vijanden heer zitten. Paas op dat ze nait ontkommen noar heur steden. De HEER, joen God, het heur joe in handen geven."
20 Jozua en Isrelieten wazzen vijanden boas, haildaal, t was n iezelke neerloag. Bloots n man of wat lokte t om in heur stad te kommen.
21 Jozua zien volk kwam ongeschonden weer bie hom in t kaamp bie Makkeda. Elkenain haar daip respekt veur Isrelieten.
22 Dou zee Jozua: "En nou grot open en dij vief keunenks der oet! Breng heur hier heer!"
23 Zai deden wat e zegd haar. Ze brochten heur bie hom: keunenks van Jeruzalem, Hebron, Jarmut, Lachis en Eglon.
24 Dou mozzen ale manlu van Israël bie Jozua kommen. Hai zee tegen ofsieren dij bie hom wazzen: "Kom op! Vout op nek van keunenks!" Dat deden ze.
25 Dou zee hai tegen heur: "Nou nait benaauwd of schrikkeg wezen! Hol kop ter veur! Want wat ter nou gebeurd is, zel de HEER doun mit aal joen vijanden doar ie nog tegen vechten mouten."
26 Dou luit e heur doodmoaken en heur lieken ophangen aan vief bomen. Doar bleven ze aan oavend tou hangen.
27 Tegen twijduustern hebben ze op odder van Jozua lieken weer tou bomen oethoald en heur in aigenste grot gooid doar ze in beziedkropen wazzen. Dikke stainen schoven ze veur ingang. Dij liggen doar nou nog aaltied.
|
